முஷாரப்பிற்கு அளிக்கப்பட்டு வந்த பாதுகாப்பை திரும்ப பெற்றது அமெரிக்க நிர்வாகம்

பாகிஸ்தான் முன்னாள் அதிபர் பர்வேஸ் முஷாரபுக்கு அளிக்கப்பட்டு வந்த பாதுகாப்பு மற்றும் அந்தஸ்தை அமெரிக்க நிர்வாகம் திரும்ப பெற்றுள்ளது.

பாகிஸ்தான் முன்னாள் பிரதமர் பெனாசிர் பூட்டோ படுகொலை செய்யப்படுவதற்கு முன்பு அவருக்கு போதுமான பாதுகாப்பை முஷாரப் அரசு வழங்கவில்லை என ஐக்கிய நாடுகள் சபை விசாரணைக் குழு ஒன்று குற்றம்சாட்டியதையடுத்து அமெரிக்கா இந்த நடவடிக்கையை எடுத்துள்ளது. எனினும் அல்கொய்தா தலைவர் பின்லேடன் கொல்லப்பட்டதையடுத்து முஷாரபின் உயிருக்கு அச்சுறுத்தல்கள் உள்ளதால் பிரிட்டன் மற்றும் ஐக்கிய அரபு எமிரேட்ஸ் ஆகியவை அவருக்கான பாதுகாப்பை அதிகப்படுத்தியுள்ளன.

அமெரிக்காவில் முஷாரப் சாதாரண குடிமகனைப் போன்று நடத்தப்படுவார். விமானநிலையங்களில் குடியேற்ற கருமபீடத்தில் அவர் வரிசையில் நிற்க வேண்டும். அவரிடம் உடல் முழுவதும் சோதனை நடத்தப்படும் என வாஷிங்டனில் உள்ள தூதரக வட்டாரங்களை மேற்கோள்காட்டி தனியார் பத்திரிக்கையில் செய்தி வெளியிட்டுள்ளது.

கடந்த காலத்தில் அமெரிக்க விமானநிலையங்களில் முஷாரப் வந்திறங்கிய பின்னர் குடியேற்ற நடைமுறைகள் விரைவாக இருக்கும். அவர் வரிசையில் காத்திருப்பதற்கு பதிலாக அமெரிக்க ஊழியரே முஷாரபுக்காக அந்த பணியைச் செய்வர். இப்போது அது நிறுத்தப்பட்டுவிட்டது என வாஷிங்டனில் உள்ள பாகிஸ்தான் தூதரக வட்டாரங்கள் தெரிவித்தன.

அமெரிக்காவில் இருந்து புறப்படும் போது அவர் வரிசையில் நிற்க வேண்டும். காலணிகள், இடுப்பு பெல்ட்டை கழற்ற வேண்டும். கைகளை மேலே தூக்கியவாறு முழு உடல்பரிசோதனைக்கு உட்பட வேண்டும். அதன்பின்னரே அவர் புறப்படுவதற்கு அனுமதி வழங்கப்படும் என தகவல்கள் தெரிவிக்கின்றன. ஆனால் பிரிட்டனும், ஐக்கிய அரபு எமிரேட்ஸும் அவருக்கான பாதுகாப்பை அதிகரித்துள்ளன

News:Lankasri

ஜேர்மன் ஜனாதிபதிக்கு பாடம் புகட்டியது ஈரான்

ஜெர்மன் அதிபர் ஏஞ்சலா மெர்கல் வந்த விமானம் இந்தியாவுக்கு வரும் வழியில் ஈரான் மீது பறக்க வழங்கியிருந்த அனுமதியை   திடீரென ஈரான் திரும்பப் பெற்றது. இதனால் அனுமதி கிடைக்கும்வரை சுமார் 2 மணி நேரம் துருக்கி நாட்டை அந்த விமானம் சுற்றிக் கொண்டிருந்ததால் அவரது இந்தியப் பயணம் மிகவும் தாமதமானது.

இது இந்தியப் பயணத்தின் அசாதாரணமான தொடக்கம் என ஜெர்மன் அதிபர்  மெர்கலின் செய்தித் தொடர்பாளர் தெரிவித்துள்ளார். விமானம் பறக்க ஈரான் அனுமதி மறுத்துவிட்டது. இதனால் தில்லிக்கு வருவது தாமதமானது என அவர் கூறினார்.

ஈரான் நாட்டின் மீது பறக்க முன்னதாக அந்த நாடு அனுமதி வழங்கியிருந்தது. ஆனால் ஈரானைச் சென்றடைவதற்கு சற்றுமுன்பாக திடீரென அனுமதிக்க மறுத்துவிட்டது என மெர்கலுடன் பயணம்செய்த ராய்ட்டர் நிறுவன செய்தியாளர் ஒருவர் தெரிவித்தார்.மெர்கலுடன் பயணம் செய்த ஜெர்மன் குழுவினர் இதை ஒருங்கிணைப்புக் கோளாறு எனத் தெரிவித்தனர். அந்த விமானத்தில் தொழில்துறைப் பிரமுகர்கள், செய்தியாளர்கள் உள்ளிட்ட ஏராளமானோர் இருந்தனர். 

இதனிடையே ஜெர்மன் அதிபரை அனுமதிக்க மறுத்தது குறித்து விளக்கம் அளிக்க பெர்லினில் உள்ள ஈரான் தூதருக்கு ஜெர்மன் சம்மன் அனுப்பி உள்ளது.

அதிபரின் விமானம் பறக்க தடைசெய்த விவகாரம் முற்றிலும் ஏற்கக்கூடியதல்ல. ஜெர்மனி மீது மரியாதை இல்லை என்பதை இந்த சம்பவம் காட்டுகிறது. இதை ஏற்றுக்கொள்ள முடியாது என ஜெர்மன் வெளியுறவு அமைச்சர் குய்டோ வெஸ்டர்வில்லி தெரிவித்தார்.

இதேவேளை ஜேர்மன் பல பொருளாதார தடைகளை இரான் மீது விதித்துள்ளமையும் இங்கு குறிப்பிடத்தக்கது.

News:Yarlmuslim

இராணுவ முகாம்களில் பல்கலைக்கழக மாணவர்க்கு பயிற்சி 3 மாத காலம் நீடிப்பு

பல்கலைக்கழகங்களுக்குத் தெரிவாகும் மாணவர்களுக்கு படைமுகாம்களில் தற்போது வழங்கப்படும் தலைமைத்துவப் பயிற்சிக்கான காலம் போதாமையினால், அடுத்த வருடத்தில் இருந்து இப்பயிற்சிக் காலத்தை இரண்டு முதல் மூன்று மாதங்கள் வரை அதிகரிக்கவுள்ளதாக உயர்கல்வி அமைச்சர் எஸ்.பி. திஸாநாயக்க தெரிவித்துள்ளார்.

தென்கிழக்குப் பல்கலைக்கழகத்தில் வெளிவாரிக் கற்கைநெறிகளைப் பூர்த்திசெய்தவர்களுக்கான சான்றிதழ்கள் வழங்கும் வைபவம் பல்கலைக்கழகத் துணைவேந்தர் கலாநிதி எஸ்.எம்.எம்.இஸ்மாயில் தலைமையில் இடம்பெற்றது. இந் நிகழ்வில் பிரதம விருந்தினராகக் கலந்துகொண்டு உரையாற் றியபோதே, உயர்கல்வி அமைச்சர் திஸாநாயக்க இவ்வாறு கூறியுள்ளார்.அவர் தனது உரையில் மேலும் தெரிவித்துள்ளதாவது, 

தற்போது பல்கலைக்கழக மாணவர்களுக்கு வழங்கப்படும் பயிற்சியில் எவ்விதமான இராணுவப் பயிற்சிகளும் வழங்கப்படுவதில்லை. இப்பயிற்சியில் கலந்துகொள்ளும் மாணவர்களுக்கு துப்பாக்கி சுடுவதற்கோ, குண்டுகளை வீசுவதற்கோ அல்லது யுத்த ஆயுதங்களை இயக்குவதற்கோ பயிற்சி வழங்கப்படவில்லை.

பல்கலைக்கழங்க மாணவர்களிடம் பல்வேறுபட்ட குறைபாடுகள் காணப்படுகின்றன. இந்த மாணவர்களின் உடுதுணிகளை இன்னும் அவர்களின் தாய்மார்களே கழுவிக்கொடுக்கின்றனர். இவர்கள் சாப்பிடப் பயன்படுத்தப்படும் கோப்பைகளையும் இவர்களின் தாய்மாரே கழுவுகின்றனர். இவ்வகையில் பல்கலைக்கழங்களுக்குத் தெரிவாகும் மாணவர்கள் பூரணமற்ற நிலையிலேயே உள்ளனர். பல்கலைக்கழக மாணவர்களின் விடுதி அறைகளை நான் பார்த்துள்ளேன். அது அழுக்குப் படிந்தும், துர்நாற்றம் கொண்டதாகவும் காணப்பட்டன. அவர்களின் சாப்பாட்டு எச்சங்கள் அவர்களுடைய கட்டிலின் கீழ் காணப்பட்டுள்ளன. எனவே இந்த மாணவர்களை நாம் சிறந்தவர்களாக மாற்ற வேண்டும்.

சரியாகப் பார்த்தால் பல்கலைக்கழகத்திற்குத் தெரிவாகும் மாணவர்களுக்குத் தற்போது வழங்கப்படும் 21 நாட்களைக் கொண்ட பயிற்சிநெறி போதாது. அடுத்தவருடம் முதல் இரண்டு முதல் மூன்று மாதமாக இந்தப் பயிற்சிநெறியின் காலத்தை நாம் அதிகரிக்கவுள்ளோம். என அவர் தனதுரையில் குறிப்பிட்டுள்ளார்.

News:Yarlmuslim

அமெரிக்காவுக்கு ஆப்கானிஸ்தான் ஜனாதிபதி இறுதி எச்சரிக்கை

அமெரிக்க படைக்கு கடைசி எச்சரிக்கை விடுப்பதாக ஆப்கானிஸ்தான் ஜனாதிபதி ஹமீட் கர்சாயி அறிவித்துள்ளார். அமெரிக்கப் படையின் வான்தாக்குதலில் பெண்கள்,  சிறுவர்கள் கொல்லப்பட்ட விவகாரம் குறித்து ஆப்கான் ஜனாதிபதி வெளியிட்ட கண்டன அறிக்கையிலேயே இந்த எச்சரிக்கை விடுக்கப்பட்டுள்ளது.

“அமெரிக்க, நேட்டோ படைகளுக்கு மீண்டும் மீண்டும் கூறுகிறேன், உங்கள் தேவையற்ற தாக்குதலால் ஆப்கான் பொது மக்களே கொல்லப்படுகிறார்கள். இது மிகப்பெரிய தவறாகும். இந்தத் தாக்குதல்களால் மனித விழுமியங்களே மீறப்படுகிறது” என்று ஆப்கான் ஜனாதிபதியின் அறிக்கையில் கூறப்பட்டுள்ளது. 

இந்நிலையில் இந்த தாக்குதலுக்கு நேட்டோ படை தமது அனுதாபத்தைத் தெரிவித்துள்ளதோட மன்னிப்புக் கேட்டுக்கொண்டுள்ளது. இந்த வவிகாரம் குறித்து விசாரணை முன்னெடுக்கப்படும் எனவும் அது கூறியுள்ளது. ஆப்கானிஸ்தானின் நவ்சாத் மாவட்டத்தில் அமெரிக்க படை நடத்திய தாக்குதலிலேயே இந்த சிவிலியன்கள் கொல்லப்பட்டனர். இதன் போது அமெரிக்க ஹெலிகொப்டர்கள் ஆப்கான் குடியிருப்பு பகுதியிலேயே தாக்குதல் நடத்தியதாக பின்னர் தெரியவந்தது.

ஆப்கானில் யுத்தம் காரணமாக கடந்த ஆண்டில் மாத்திரம் 2,777 சிவிலியன்கள் கொல்லப்பட்டுள்ளதாக ஐ. நா. அறிக்கை குறிப்பிட்டுள்ளது.

News:Yarlmuslim

அணுமின் நிலையங்களை மூட ஜெர்மன் ஆளும் கூட்டணி முடிவு

பெர்லின் : "நாட்டின் அனைத்து அணுமின் நிலையங்களும், வரும் 2022ம் ஆண்டுக்குள் படிப்படியாக இழுத்து மூடப்படும்' என்று, ஜெர்மனியின் ஆளும் கூட்டணி அறிவித்துள்ளது. இதற்கு உற்பத்தி நிறுவனங்கள் கடும் எதிர்ப்பு தெரிவிக்கக்கூடும் என, எதிர்பார்க்கப்படுகிறது. ஜெர்மனியில், தற்போது 17 அணுமின் நிலையங்கள் உள்ளன. நாட்டுக்குத் தேவையான ஒட்டு மொத்த மின்சாரத்தில், 23 சதவீதம் இவற்றிலிருந்து பெறப்படுகிறது. ஜப்பானில் நிலநடுக்கம், சுனாமி ஏற்பட்ட பின், ஜெர்மனியில் இயங்கி வந்த மிகப் பழைய ஏழு அணுமின் நிலையங்கள் மூடப்பட்டன. ஏற்கனவே ஒரு அணுமின் நிலையம் பல ஆண்டுகளாகச் செயல்படாமல் நிறுத்தி வைக்கப்பட்டிருந்தது.

இந்நிலையில், நாட்டின் அனைத்துப் பகுதிகளிலும் அணுமின் நிலையங்களுக்கு எதிரான ஆர்ப்பாட்டங்கள் நடக்க ஆரம்பித்தன. நேற்று முன்தினமும் நாட்டின் பல பகுதிகளில் பெருமளவில் ஆர்ப்பாட்டம் நடந்தது. இதையடுத்து, அதிபர் ஏஞ்சலா மெர்க்கெல்லின் ஆளும் கட்சியான கிறிஸ்தவ குடியரசுக் கட்சியும், அதன் கூட்டணிக் கட்சிகளும், அணுமின் நிலையங்களின் எதிர்காலம் குறித்து அவசர ஆலோசனையில் ஈடுபட்டன.
அதில், வரும் 2022ம் ஆண்டுக்குள், நாட்டின் அனைத்து அணுமின் நிலையங்களையும் படிப்படியாக இழுத்து மூடுவது என்று முடிவு செய்யப்பட்டது. கூட்டம் முடிந்த பின், சுற்றுச்சூழல் அமைச்சர் நார்பெர்ட் ரோயட்கென் இதை செய்தியாளர்களிடம் அறிவித்தார். ஏற்கனவே மூடப்பட்டவை ஏழு. செயல்படாத நிலையம் ஒன்று போக, ஆறு நிலையங்கள் 2011ம் ஆண்டுக்குள்ளும், புதிதாக துவங்கப்பட்ட மூன்று நிலையங்கள் 2022க்குள்ளும் படிப்படியாக மூடப்படும். அணுமின் நிலையங்கள் மூடப்படுவதால் ஏற்படும் மின்சார உற்பத்தி இழப்பு, வேறு வகைகளில் ஈடுகட்டப்படும். ஆளும் கூட்டணியின் இந்த முடிவுக்கு ஜெர்மனி பார்லிமென்டும், எதிர்க்கட்சியினரும் ஒப்புதல் பெறப்பட வேண்டும். ஜப்பான் நிலநடுக்கத்துக்குப் பின் ஏழு நிலையங்கள் மூடப்பட்டதற்கே, உற்பத்தித் துறை சார்ந்த பல நிறுவனங்கள் கடும் எதிர்ப்பு தெரிவித்தன. இந்த அறிவிப்புக்கு இன்னும் பலமான எதிர்ப்பு எழக் கூடும் என்று தெரிகிறது.

News:Dinamalar

ஒஸாமாவை காட்டிக்கொடுத்தது யார்..? புதிய தகவல் வெளியாகியது

பாகிஸ்தானில் உள்ள அபோதாபாத்தில் ஒரு வீட்டில் பதுங்கியிருந்த முஸ்லிம் வீரப்போராளி பின்லேடன் அமெரிக்க ராணுவத்தால் சுட்டுக் கொல்லப்பட்டார். அவருக்கு கூரியர் கடிதம் மூலம் தகவல் பரிமாற்றம் செய்து வந்த அபுஅகமது அல்- குவைதியுடன் டெலிபோன் பேச்சை ஒட்டுக் கேட்டு பின்லேடன் இருப்பிடத்தை அமெரிக்கா மோப்பம் பிடித்ததாக தகவல் வெளியானது. தற்போது அது உண்மை இல்லை. பின்லேடன் இருப்பிடத்தை காட்டிக் கொடுத்தது தலிபான்இயக்கத்தின் தலைவர் முல்லா அப்துல் ஹானிபிராதர் என தெரிய வந்துள்ளது.

அமெரிக்கா 5 முஸ்லிம்களை தேடுகிறதாம் - காட்டிக்கொடுக்கப் போவது யார்..?

தேடப்பட்டு வரும் 5 முக்கிய முஸ்லிம் போராளிகளின் பெயர்களை அமெரிக்கா வெளியிட்டுள்ளது. அல்-காய்தாவின் இரண்டாம் நிலை கமாண்டர் அல்ஜவாஹிரி, முல்லா உமர், இலியாஸ் காஷ்மீரி, ஹக்கானி அமைப்பின் தலைவர் சிராஜுதீன் ஹக்கானி, அல்- காய்தாவின் லிபிய நாட்டுத் தலைவர் அப்துல் ரஹ்மான் ஆகியோரது பெயர்கள் இதில் இடம் பெற்றுள்ளன. 

ஒவ்வொரு பட்டதாரிக்கும் அரசு வருடாந்தம் 2 1/2 இலட்ச ரூபாவை செலவிடுகிறதாம்

பல்கலைக்கழகத்தில் கல்வி பயிலும் தமது பிள்ளைகளின் எதிர்காலம் குறித்து எந்தவொரு பெற்றோரும் இனி கவலைப்பட வேண்டியதில்லை. புதிதாக பல்கலைக்கு வருபவர்கள் மீது பகிடிவதை செயற்பாடுகளை மேற்கொள்ள இடமளிக்கப்படமாட்டாது என்று உயர் கல்வி அமைச்சர் எஸ். பி. திசாநாயக்க தெரிவித்துள்ளார்.

இவ்வாறான பகிடி வதையில் ஈடுபடுவோரின் பிரதான நோக்கம் புதிய மாணவர்களின் தன் நம்பிக்கை மற்றும் தனிப்பட்ட குணத்தை இல்லாமற்செய்வதாகும் என்று அவர் மேலும் கூறினார்.

இலங்கை இளைஞர்களில் திறமைவாய்ந்தவர்களே அரசாங்க பல்கலைக்கழகங்களுக்குள் நுழைகின்றனர். ஒவ்வொரு பட்டதாரிக்கும் அரசு வருடாந்தம் 2 1/2 இலட்ச ரூபாவை செலவிடுகிறது. அதேபோல் ஒவ்வொரு பிக்கு மாணவனுக்கும் 3 இலட்சம் ரூபா செலவிடப்படுகிறது. இவ்வாறு நாட்டின் எதிர்கால தலைவர்களை உருவாக்கி அரசாங்கம் பல கோடி ரூபாவை செலவிடுவது குறிப்பிடத்தக்கது.

இவ்வாறான செயற்பாட்டை பகிடி வதையில் ஈடுபடுவோர் பின்னோக்கி கொண்டு செல்கின்றனர். அதற்கு இடமளிக்கப்படமாட்டாது. பல்கலைக்கழக கல்வி முறையை சர்வதேச தரத்துக்கு முன்னெடுத்துச் செல்வதே அரசாங்கத்தின் நோக்கமாகும் என்று அமைச்சர் திஸாநாயக்க மேலும் குறிப்பிட்டார்.

News:Yarlmuslim

'ரணவிக்கிரம ஸ்னோவி' உயிரிழந்தது

விடுதலைப் புலிகளுக்கு எதிரான போரில் கொமாண்டோப் படையினரின் வழிகாட்டியாகச் செயற்பட்ட போது, காயமடைந்திருந்த ஸ்னோவி என்ற நாய் கடந்த 24ம் திகதி உயிரிழந்துள்ளது. 4வது கொமாண்டோ படைப்பிரிவின் கோப்ரல் சம்பத் இந்த நாயை 2004ம் ஆண்டு தொடக்கம் பயிற்சி கொடுத்து பராமரித்து வந்தார். 

இராணுவத்தில் எஸ்-080 என்ற இலக்கம் வழங்கப்பட்டிருந்த இந்த நாய் வெலிஓயா மற்றும் அதனைச் சுற்றியுள்ள பகுதிகளில் புலிகளின் மறைவிடங்களைத் தேடிக் கண்டுபிடிக்கும் நடவடிக்கைகளில் முக்கிய பங்கு வகித்தது. 

2008 மார்ச் 15ம் நாள் கெம்பிலிஓயா காட்டுப்பகுதியில் நடந்த மோதல் ஒன்றின்போது கொல்லப்பட்ட புலிகள் இயக்க உறுப்பினர் ஒருவரின் உடையின் ஒரு பகுதியை இந்த நாய் எடுத்து வந்து கொண்டிருந்த போது திடீரென எதிர்த்திசையில் இருந்த மற்றொரு புலிகள் இயக்க உறுப்பினர் படையினர் மீது துப்பாக்கிச் சூடு நடத்தியதுடன் கைக்குண்டை வீசினார். 

கைக்குண்டு வெடிப்புச் சிதறல் ஒன்று ஸ்னோவியின் தலையில் பாய்ந்து படுகாயமடைந்தது. உடனடியாக அது உலங்குவானூர்தி மூலம் அனுராதபுரத்துக்குக் கொண்டு செல்லப்பட்டது. பின்னர் அங்கிருந்து பெரதெனியாவில் உள்ள மிருக மருத்துவ போதனா மருத்துவமனைக்கு கொண்டு செல்லப்பட்டது. 

மிருக மருத்துவநிபுணர் அசோகா டங்கொல்லவிடம் தலைமையிலான மருத்துவ நிபுணர்கள் குழு சத்திரசிகிச்சை மேற்கொண்டு இந்த நாயைக் காப்பாற்றினர். மிகவும் மோசமான நிலையில் காயமடைந்திருந்த இந்த நாய்க்கு வேறொரு நாயின் குருதியும் ஏற்றப்பட்டது. 

இந்த நாய் போரின்போது வழங்கிய பங்களிப்புக்காக ‘ரணவிக்கிரம‘ என்ற பதக்கமும் வழங்கப்பட்டுள்ளது. விடுதலைப் புலிகளுக்கு எதிரான போரில் பல வெற்றிகளுக்கு இந்த நாய் காரணமாக இருந்ததாக கொமாண்டோப் படைப்பிரிவு அதிகாரிகள் கூறியுள்ளனர். 

குறிப்பாக வேவு நடவடிக்கைளுக்காக மறைந்திருக்கும் விடுதலைப் புலிகள் இயக்க உறுப்பினர்களை காடுகளில் தேடிக் கண்டுபிடிக்கும் நடவடிக்கையிலும், ஆழ ஊடுருவும் அணிகளுக்கான வழிகாட்டியாகவும் இந்த நாய் செயற்பட்டுள்ளது. 

இந்தநாயின் இழப்பு கொமாண்டோப் படைப்பிரிவின் வழிகாட்டும் குழுக்களுக்கு பேரிழப்பு என்றும் அந்தப் படைப்பிரிவின் அதிகாரிகள் தெரிவித்துள்ளனர். உயிரிழந்த நாய் கணேமுல்லையில் உள்ள கொமாண்டோ றெஜிமென்ட் தலைமையகத்தில் இராணுவ மரியாதைகளின் பின்னர் அடக்கம் செய்யப்பட்டுள்ளது. இந்த நிகழ்வில் இராணுவ அதிகாரிகள் மற்றும் கொமாண்டோ படையினரும் கலந்து கொண்டனர்.

90 மில்லியன் டொலரை அபாராதமாக செலுத்த ஹொஸ்னி முபாராக் மீது உத்தரவு

இணையதளம் மற்றும் தொலைபேசி சேவைகளை முடக்கிய எகிப்து முன்னாள் ஜனாதிபதிக்கு 90 மில்லியன் டொலர் அபராதமாக விதிக்கப்பட்டுள்ளது. எகிப்து ஜனாதிபதியாக இருந்த ஹொஸ்னி முபாரக், பொதுமக்களின் போராட்டத்துக்கு பின்னர் கடந்த பெப்ரவரி 11ம் திகதி பதவி விலகினார். அவர் கைது செய்யப்பட்ட நிலையில், ஆஸ்பத்திரியில் சிகிச்சை பெற்று வருகிறார். 

வடக்கின் தமிழ் மக்களைச் சந்திப்பதற்கு ஜெயலலிதாவிற்கு அரசாங்கம் அழைப்பு?

வடக்கின் தமிழ் மக்களை நேரில் சந்தித்துக் கலந்துரையாட இலங்கைக்கான விஜயமொன்றை மேற்கொள்ளுமாறு அரசாங்கம் தமிழ்நாடு முதலமைச்சர் ஜெயலலிதாவுக்கு அழைப்பொன்றை விடுப்பதற்குத் தீர்மானித்துள்ளது.

வடக்கில் யுத்தம் நிலவிய பிரதேசங்களில் சுற்றுப் பயணமொன்றை மேற்கொண்டு அங்குள்ள மக்களுடன் கலந்துரையாடி அவர்களின் கருத்துக்களைக் கேட்டறியவும் தமிழ்நாடு முதலமைச்சர் ஜெயலலிதாவுக்கு சந்தர்ப்பமொன்றை ஏற்படுத்திக் கொடுக்க அரசாங்கம் உத்தேசித்துள்ளது.

அதன் மூலம் இலங்கை அரசாங்கம் தொடர்பான ஜெயலலிதாவின் எதிர்ப்புணர்வுகளைத் தணிப்பதற்கு அரசாங்கம் எதிர்பார்த்துள்ளது.

அத்துடன் எதிர்வரும் காலங்களில் தமிழ்நாடு மாநிலத்தில் இலங்கை அரசாங்கம் தொடர்பான எதிர்ப்புணர்வுகளைத் தணிப்பதற்கும், அங்குள்ள இலங்கைத் தமிழ் அகதிகளை திரும்பவும் நாட்டுக்கு வரவழைப்பதற்கும் அரசாங்கம் தமிழ்நாடு அரசாங்கத்தின் ஒத்தாசையைப் பெற்றுக் கொள்ளவும் உத்தேசித்துள்ளதாக தகவல்கள் வெளியாகியுள்ளன.

News:Tamilwin

'என்னை கூண்டில் நிறுத்தியவர்களை இயற்கை தண்டிக்கும்' - பொன்சேக்கா சாபம்

என்னோடு கைது செய்யப்பட்ட கேபி அரச கைதியாகவும் நான் அரசியல் கைதியாகவும் சிறைவைக்கப்பட்டுள்ளேன் என முன்னாள் இராணுவத் தளபதி மேஜர் பொன்சேகா தெரிவித்துள்ளார். வெள்ளைக் கொடி விவகார வழக்கில் இன்று வியாழக்கிழமை 5ம் நாளாக அவர் சாட்சியமளிக்கையிலேயே இவ்வாறு தெரிவித்துள்ளார். மேலும் அவர் அங்கு சாட்டியமளிக்கையில் 

அரசியல் பழிவாங்கல் நோக்கத்துக்காகவே நான் சிறை வைக்கப்பட்டுள்ளேன். இராணுவ நீதிமன்றில் நடந்த விடயங்கள் ஊடகங்களின் ஊடக வெளியிட அனுமதி மறுக்கப்பட்டது. அத்தோடு இராணுவ நீதிமன்றில் சட்டத்தரணிகளுடன் கலந்துரையாட எனக்கு இடமளிக்கப்படவில்லை. இராணுவ நீதிமன்றின் தலைவராக ஜனாதிபதிக்கும் பாதுகாப்பு செயலாளருக்கும் தேவைக்கேற்ப செயற்படக் கூடியவர்கள் நியமிக்கப்பட்டனர். 

என்னை சிறையில் அடைத்து வைத்தாலும் எனது அரசியல் கொள்கைகள் மாறாது அதனை அழிக்கவும் முடியாது. சுயாதீன நீதிமன்றமோ அல்லது இயற்கையோ என்னை இவ்வாறு குற்றவாளி கூண்டில் நிறுத்தியவர்களை சரியான நேரத்தில் தண்டிக்கும். இது நிச்சயம். 

நீதிமன்ற கட்டமைப்பும் நீதிச் சேவைகள் ஆணைக்குழுவும் ஜனாதிபதியின் கைப்பிடிக்குள் மாற்றுவதற்கு ஜனாதிபதி முயல்கிறார். ஐக்கிய நாடுகளினாலும் சர்வதேச சமூகங்களினாலும் இலங்கைக்கு எதிராக முன்வைக்கப்பட்டுள்ள இராணுவம் தொடர்பான அனைத்து குற்றச்சாட்டுக்களுக்கும் பதிலளிக்க கூடிய சரியான நபர் நானே. 

என்றும் நான் மக்களின் ஜெனரல் சரத் பொன்சேகா. நாட்டை மீட்டெடுத்த எனக்கோ அரசியல் கைதியாக பட்டம் சூட்டப்பட்டுள்ளது.நான் இராணுவ தலைவராக பதவியேற்றதன் பின்னர் எனக்கு அடுத்து வரும் இராணுவத் தளபதிக்கு யுத்த சூழ்நிலையை மீதம் வைக்க மாட்டேன் என உறுதியளித்திருந்தேன்.அந்த வாக்குறுதியை நான் நிறைவேற்றியிருந்தேன். அந்த வாக்குறுதியை நான் நிறைவேற்றி இருக்காவிட்டால் இன்னும் யுத்தம் தொடர்ந்து இருக்கும். 

நான் எனது கண்காணிப்பால் திறமை மிக்க அதிகாரிகளாக மாற்றிய பல இராணுவ அதிகாரிகளை அரசாங்கம் பழிவாங்கியுள்ளது. அவர்களுக்கு ஓய்வூதியம் கூட மறுக்கப்பட்டுள்ளது. ஆனால் சவேந்திர சில்வா போன்ற பலவீனமுற்ற அதிகாரிகளுக்கு வெளிநாடுகளில் சிறந்த பதவிகளும், பதவி உயர்வுகளும் வழங்கப்பட்டுள்ளது. 

ஊடகவியலாளர் லசந்த விக்கிரமதிங்கவின் கொலைக்கு என்னையும் ஒரு குற்றவாளியாக மாற்ற அரசாங்கம் பல முயற்சிகளை மேற்கொண்டது. இதன் ஒரு கட்டமாக முன்னாள் குற்றப்புலனாய்வுத் துறையின் அதிகாரி ஒருவரை விலை கொடுத்து வாங்க முயற்சித்தது. 

ஆனால் அவர் நீதிமன்றில் சாட்சியமளிக்கும் போது "இராணுவ அதிகாரி ஒருவர் பணம் கொடுப்பதாகவும், சுகபோகங்களுடன் வெளிநாட்டு வாழ்கையை பெற்று தருவதாகவும் உறுதியளித்ததாகவும் சரத் பொன்சேகாவினை லசந்த விக்ரமதுங்கவின் கொலையுடன் தொடர்புபடுத்த ஆவோரசனை வழங்கினார்"என அவர் சாட்சிமளித்தார். 

இதனால் வெள்ளைக் கொடி வழக்கில் சாட்சிமளிக்க வந்தவர்களும் அரசாங்கத்தினால் விலை கொடுத்து வாங்கப்பட்டவர்கள் என நான் சந்தேகிக்கிறேன். என்றார்.  இன்றைய சாட்சியமளிப்பினை கருத்திற் கொண்ட தீபாலி விஜேசுந்தர தலைமையிலான நீதயரசர் அடங்கிய குழு வழக்கினை 31 ம் திகதிக்கு ஒத்திவைத்துள்ளது. 

News:Yarlmuslim

இன்டர்போல் பொலிசாரின் தேடப்படுவோர் பட்டியலில் மீண்டும் இணைந்து கொண்டுள்ள கே.பி.

இன்டர்போல் பொலிசாரின் தேடப்படுவோர் பட்டியலில் கே.பி. எனப்படும் குமரன் பத்மநாதனின் பெயர் மீ்ண்டும் சோ்க்கப்பட்டுள்ளது.

முன்னாள் இந்தியப் பிரதமர் ராஜீவ் காந்தியின் படுகொலைச் சம்பவத்தை விடுதலைப் புலிகளே திட்டமிட்டு மேற்கொண்டதாக அண்மையில் அவர் வழங்கியிருந்த பேட்டியொன்றே அவர் மீண்டும் இந்தியாவின் நீதிமன்ற தேடப்படுவோர் பட்டியலிலும் அதன் மூலமாக  இன்டர் போல் பொலிசாரின் தேடப்படுவோர் பட்டியலிலும் இடம்பிடிக்க காரணமாக அமைந்துள்ளது.

அதற்கு முன்பு சர்வதேச ஆயுதக்கடத்தல்கள் தொடர்பான குற்றச்சாட்டுகளின் பேரில் அவரது பெயர் இன்டர்போல் பட்டியலில் உள்ளடக்கப்பட்டிருந்த போதும் அவர் கைது செய்யப்பட்டதையடுத்து அது நீக்கிக் கொள்ளப்பட்டிருந்தது.

கே.பி எனப்படும் குமரன் பத்மநாதன் முன்னாள் இந்தியப் பிரதமர் ராஜீவ் காந்தியைப் புலிகளே கொன்றனர் என்று பரபரப்பான பேட்டியொன்றை இந்திய ஊடகமொன்றுக்கு வழங்கியிருந்தார்.

அதனைத் தொடர்ந்து இந்தியாவின் நீதிமன்ற தேடப்படுவோர் பட்டியலில் விடுதலைப் புலிகளின் முன்னாள் அனைத்துலக உறவுகளுக்கான பொறுப்பாளர் குமரன் பத்மநாதன் பெயர் உள்ளடக்கப்பட்டுள்ளது. அதனைத் தொடர்ந்து இன்டர்போல் பொலிசாரும் தமது பட்டியலில் அவரது பெயரை மீளவும் உள்ளடக்கியுள்ளனர்.

தேடப்படுபவர் பட்டியலில் கே.பி. பக்கம்

 News:Lankasri

உலக போரின் போது நாய்களுக்கு பேசும் பயிற்சி அளித்த ஹிட்லர்

ஜேர்மானியர்கள் நாய்களை மனிதனுக்கு சமமாக புத்தியுள்ள பிராணிகளாக கருதினார்கள். சர்வாதிகாரி ஹிட்லர் சிறந்த புத்தியுடைய நாய்களின் படை ஒன்றை வைத்திருந்தார்.

இந்த பயங்கர நாய்கள் பேசும் நாய்களாக இருந்தன. இந்த நாய்கள் தங்கள் ராணுவ அதிகாரிகளுக்கு தகவல் பரிமாற்றிக் கொள்ள உதவும் என்று ஹிட்லர் நம்பினார்.

தற்போதைய அரசாங்கத்தில் முஸ்லிம்களுக்கு நெருக்கடி அதிகரிப்பு

இலங்கை வாழ் சிறுபான்மை முஸ்லிம் மக்களை மதிக்காது அரசாங்கம் வேலைத்திட்டங்களை முன்னெடுத்துச் செல்வதாக ஐக்கிய தேசிய கட்சி குற்றம் சுமத்தியுள்ளது. 

பல்கலைக்கழக தலைமைத்துவ பயிற்சி திட்டத்தின் போது முஸ்லிம் மாணவர்களின் கலாச்சாரம் குறித்து கவனத்தில் கொள்ளப்படவில்லை எனவும் அதனால் முஸ்லிம் மாணவர்கள் பல பிரச்சினைகளுக்கு முகம் கொடுப்பதாகவும் ஐக்கிய தேசிய கட்சியின் பாராளுமன்ற உறுப்பினர் கபீர் ஹசீம் தெரிவித்துள்ளார். 

மேஜர் ஜெனரல் ஒருவரை கட்டளையிடும் பணிகளிலிருந்து நீக்கினேன் - சரத் பொன்சேகா

பயங்கரவாதத் தாக்குதல்களின் போது கண்ணீர் வடித்த மேஜர் ஜெனரல் தர அதிகாரி  ஒருவரை தாம் கட்டளையிடும் பணிகளிலிருந்து நீக்கியதாக முன்னாள் இராணுவத் தளபதி சரத் பொன்சேகா தெரிவித்துள்ளார்.

போர் வெற்றியின் போது வெட்டப்பட்ட கேக்கின் அளவு குறைவடைவதனைப் போன்று படைவீரர்கள் நாட்டுக்கு ஆற்றிய அளப்பரிய சேவை தொடர்பான அரசாங்கத்தின் நிலைப்பாடும் குறைவடைந்துள்ளன.

நீதிமன்ற விசாரணைகளில் கலந்து கொண்ட போது அவர் இதனகை குறிப்பிட்டுள்ளார்.

இராணுவத்தினர் பின்னடைவுகளை எதிர்நோக்கிய போது கோழைத்தனமாக கண்ணீர் வடித்த இராணுவ மேஜர் ஜெனரல் ஒருவரை கட்டளையிடும் பணிகளிலிருந்து தாம் நீக்கியதாக அவர் சுட்டிக்காட்டியுள்ளார்.

கடந்த வருடம் ஜனவரி மாதம், குறித்த மேஜர் ஜெனரலே தம்மை கைது செய்ததாக அவர் சுட்டிக்காட்டியுள்ளார்.

News:Lankasri

கொழும்பு மக்களை துன்புறுத்துவதாக அரசாங்கம் மீது குற்றச்சாட்டு

கொழும்பு நகரின் துரித அபிவிருத்தித் திட்ட செயலாக்கத்தின்போது கவனத்தில் எடுத்துக் கொள்ள வேண்டிய விடயங்கள் தொடர்பாக சிறிலங்காவின் கல்வியாளர்கள்  குழுவான Friday Forum அறிக்கை ஒன்றை வெளியிட்டுள்ளது. இந்த அமைப்பு, அமைதி மற்றும் சமாதானத்திற்கான பங்களிப்பு, ஜனநாயகம், நல்லாட்சி, சமூக நீதி போன்றவற்றை கவனத்தில் கொள்ளவும், ஆலோசனை வழங்கவும்  உருவாக்கப்பட்டது.

ரிஷானாவின் பரிதாபம் தொடருகிறது

சவூதியில் மரணதண்டனை விதிக்கப்பட்டுள்ள இலங்கை பணிப்பெண்ணான ரிஷானா நபீக், உளநலம் பாதிக்கப்பட்டவராக இருப்பதாகவும் நினைவுகளை மறந்தும் விடயங்களை விளங்கிக்கொள்ளாத தன்மையையும் கொண்டவராகக் காணப்படுவதாகவும் ஏசியன் ரிபியூன் இணையத்தளத்தை மேற்கோள்காட்டி செய்திகள் வெளியாகியுள்ளன.

அதேசமயம், ரிஷானா நபீக்கிற்கு மரணதண்டனை வழங்கப்பட வேண்டுமென்பதில் இறந்த 4 மாதக் குழந்தையின் தாயார் பிடிவாதமாக வலியுறுத்துவதாகத் தெரிவிக்கப்படுகிறது. 2005 மே 22 முதல் ரிஷானா சிறையில் இருந்து வருகின்றார். 2007 ஜூன் 16 இல் அவருக்கு மரணதண்டனை விதிக்கப்பட்டது. சிறைச்சாலையில் நீண்டகாலமாக இருந்து வருவதால் அவரின் மனநிலை பாதிக்கப்பட்டதாகக் கூறப்படுகிறது. அவரின் இந்த உளநலக் கோளாறு தொடர்பான விடயமானது உயர்மட்ட அதிகாரிகளின் கவனத்துக்குக் கொண்டு செல்லப்பட்டால் அவருக்கான தண்டனையை நிறைவேற்றுவது பிற்போடப்படுமெனவும் அவர் குணமடையும்வரை அந்த நடவடிக்கை ஒத்திவைக்கப்படுமெனவும் கூறப்படுகிறது. 

இந்த மாதம் 17 ஆம் திகதி இலங்கை கைத்தொழில்துறை வர்த்தக அமைச்சர் ரிஷாத் பதியூதீன் ரியாத் ஆளுநர் சல்மான் பின் அப்துல் அஸீஸைச் சந்தித்திருந்தார். ரிஷானாவின் வாழ்க்கையைப் பாதுகாப்பதற்கான நடவடிக்கைகளை மேற்கொள்ளுமாறு அவர் வேண்டுகோள் விடுத்திருந்தார்.

News:Yarlmuslim

இளைஞர்ளை பேஸ்புக்சீரழிக்கிறதா(Face Book)

பேஸ்புக் சமூக இணைப்பு இணையத் தளம் மூலம் எத்தனையோ நல்ல காரியங்கள் இடம்பெறத்தான் செய்கின்றன. அதே அளவுக்கு கூடாத காரியங்களும் இடம்பெற்றுக் கொண்டே இருக்கின்றன.

மக்களை அழித்த கருணா சுகபோகம், புலிகளை ஒழித்த நான் சிறையில் - பொன்சேக்க

நாட்டையும் அழித்து, பொதுமக்களையும் அழித்து, பொதுச்சொத்துகளுக்குச் சேதம் ஏற்படுத்திய கருணா அம்மான் நீதிமன்றில் நிறுத்தப்படாமல் அமைச்சர் பதவி வழங்கப்பட்டு சுகபோகம் அனுபவிக்கின்றார். நாட்டுக்காக அர்ப்பணிப்புடன் செயற்பட்டுப் புலிகளை ஒழித்த நான் சிறைத் தண்டனை அனுபவிக்கின்றேன் என்று மேல்நீதி மன்றில் பச்சாதாபப்பட்டார் இராணுவத்தின் முன்னாள் தளபதி சரத் பொன்சேகா.     

வெள்ளைக்கொடி விவகார வழக்கு மேல்நீதிமன்றில் நீதியரசர்களான தீபாலி விஜேசுந்தர, எச்.என்.பி.பி. வராவௌ, சர்பிக் ரஷீக் ஆகியோர் முன்னிலையில் விசாரணைக்கு எடுத்துக்கொள்ளப்பட்டது. முற்பகல் 11.20 மணிக்கு நீதிமன்றில் இந்த வழக்கு விசாரணைக்கு எடுத்துக்கொள்ளப்பட்டு ஒருநிமிடத்துக்குள் மின்சாரம் தடைப்பட்டுவிட்டது. இதனை அடுத்து நீதிமன்றக் கதவுகளைத் திறக்கும் படி நீதியரசர் தீபாலி விஜேசுந்தர அதிகாரிகளைப் பணித்தார். அத்துடன், சட்சியமளிக்க முடியுமா என்றும் சரத் பொன்சேகாவிடம் கேட்டார். அதற்கு அவர் போதியளவான வெளிச்சம் இல்லாதமையால் சாட்சியப் பதிவாளர் தவறுகளை இழைக்கலாம் என்று கூறினார்.

  

இதனைக் கவனத்தில் கொண்ட நீதியரசர் தீபாலி விஜேசுந்தர முன்னால் வந்து சாட்சியம் அளிக்கும்படி சரத் பொன்சேகாவிடம் கேட்டுக்கொண்டார். இதனைத் தொடர்ந்து சரத் பொன்சேகா முன்னால் வந்து சாட்சியமளிக்க ஆரம்பித்தார்.பல்வேறு சந்தர்ப்பங்களிலும் தனது சொந்தங்களைக் கூடப் புறக்கணித்து விட்டு நாட்டுக்காகச் சேவைசெய்த தான் இரு தடவைகள் காயமடைந்தார் என்று தெரிவித்தார் சரத் பொன்சேகா. இருப்பினும் இப்போது தான் சிறையில் வாடுகிறார் என்றும் நாட்டை பிரித்துவிடும் நோக்கில் செயற்பட்டு வந்த கருணா அம்மான் அரச சுகபோகங்களை அனபவிக்கிறார் என்றும் குறிப்பிட்டார் அவர்.

News:Yarlmuslim

பல்கலைக்கழக மாணவர்களுக்கு தலைமைத்துவ பயிற்சி இன்றுமுதல் ஆரம்பம்

பல்கலைக்கழகத்திற்கான கற்கை அனுமதியை பெற்றுள்ள மாணவர்களுக்கான தலைமைத்துவ பயிற்சிகள் இன்று முதல் ஆரம்பிக்கப்படவுள்ளதாக உயர்கல்வியமைச்சின் செயலாளர் சுனில் ஜயந்த நவரட்ன தெரிவித்துள்ளார்.

குறித்த பயிற்சி நெறியின் ஆரம்ப நிகழ்வு ஜனாதிபதி மஹிந்த ராஜபக்ஷ தலைமையில் இன்று முற்பகல் 11 மணியளவில் ஆரம்பித்து வைக்கப்படுவதாக அவர் குறிப்பிட்டார்.

நேற்றளவில் 82 சதவீதமான மாணவர்கள் பயிற்சி நெறியின் பொருட்டு மத்திய நிலையங்களுக்கு வந்திருந்ததாக அவர் தெரிவித்தார்.

இன்றைய தினம் முதல் ஆரம்பிக்கப்படும் மூன்று மாதகால தலைமைத்துவ பயிற்சிநெறியில் கலந்து கொள்ள தவறிய மாணவர்கள் எதிர்வரும் ஜுன் மாதம் 16 ம் திகதி கலந்து கொள்ள முடியும் என உயர்கல்வியமைச்சு செயலாளர் குறிப்பிட்டார்.

நாமல் ராஜபக்ஷவின் இணைப்பாளரது வீட்டின் மீது தாக்குதல் நடத்திய சந்தேக நபர்கள் கைது

நாடாளுமன்ற உறுப்பினர் நாமல் ராஜபக்ஷவின் இணைப்பாளரது வீட்டின் மீது துப்பாக்கிப் பிரயோகம் நடத்திய சந்தேக நபர்களை காவல்துறையினர் கைது செய்துள்ளனர்.

கைது செய்யப்பட்டுள்ள நான்கு சந்தேக நபர்களில் இருவர் காவல்துறையைச் சேர்ந்தவர்கள் என்பது குறிப்பிடத்தக்கது.

கதிர்வீச்சு கலந்த நீரை வெளியேற்ற ராட்சத தெப்பம் நன்கொடை

ஜப்பானில் அணுமின் நிலையத்தில் சேர்ந்துள்ள கதிர்வீச்சு கலந்த தண்ணீரைப் பாதுகாப்பாக வெளியேற்ற ராட்சத தெப்பம் பயன்படுத்தப்பட உள்ளது.

ஜப்பானில் மார்ச் 11ம் திகதி ஏற்பட்ட நிலநடுக்கம், சுனாமியால் வடகிழக்குப் பகுதியிலுள்ள புகுஷிமா அணு உலை முற்றிலும் சேதம் அடைந்தது. அங்கிருந்த மூலக்கூறுகள் உருகத் தொடங்கின. கதிர்வீச்சுப் பரவியதால் 20 கி.மீ சுற்றளவுக்கு மக்கள் வெளியேற்றப்பட்டனர்.

அணு உலைகளில் இருந்த பாதுகாப்புத் திட்டங்கள் முழுவதும் சேதமடைந்ததால் மூலக்கூறுகளில் வெப்பம் கடுமையாக உயர்ந்தது. இது வெடித்துச் சிதறி பேரழிவு ஏற்படும் அபாயம் எழுந்தது.

வெப்பத்தைத் தணிக்க பல நடவடிக்கைகள் எடுக்கப்பட்டன. ஹெலிகாப்டர் மூலம் கடல் நீரை அணு உலைகள் மீது இரைத்தனர். இரண்டு மாதங்களாக நடவடிக்கைகள் தொடர்ந்து வருகின்றன. இதனால் அங்கு ஏராளமாக கதிர்வீச்சுள்ள நீர் சேர்ந்துள்ளது. 90 ஆயிரம் டன் அளவு கதிர்வீச்சு கலந்துள்ள நீர் இங்கு உள்ளது.

அதைப் பாதுகாப்பான நீராக மாற்றவும், அதை வெளியேற்றவும் முயற்சிகள் நடந்து வருகின்றன.

இந்நிலையில் ஷிசுவோகா நகராட்சி புகுஷிமா அணுமின் நிலையத் துறைமுகத்துக்கு ஒரு ராட்சத தெப்பத்தை அனுப்பியுள்ளது. இது 136 மீற்றர் நீளமும், 46 மீற்றர் அகலமும், 3 மீற்றர் உயரமும் உடையது. இதில் 10 ஆயிரம் டன் நீர் கொள்ளளவு உள்ளது.

இதன் மூலம் சிறிது சிறிதாக கதிர்வீச்சு பரவிய நீரைப் பாதுகாப்பாக வெளியேற்ற புகுஷிமா அணுமின் நிலையத்துக்கு நன்கொடையாக ஷிசுவோகா நகராட்சி வழங்கியுள்ளது

News:Lankasri

மிகவும் எளிமையான முறையில் நடக்கவுள்ள மன்னரின் திருமணம்

பிரிட்டன் இளவரசர் வில்லியம்ஸ் திருமணம் மிகவும் ஆடம்பரமாக நடந்து முடிந்தது. ஜூலையில் மொனாகோ இளவரசர் இரண்டாம் ஆல்பர்ட் திருமணம் நடக்கவுள்ளது.

இந்நிலையில் இந்தாண்டில் மிகவும் எளிமையான முறையில் தனது திருமணத்தினை நடத்தவுள்ளார் பூட்டான் நாட்டு மன்னர். வரும் அக்டோபர் மாதம் கல்லூரி மாணவி ஒருவரை கரம் பிடிக்கிறார்.

இவரது திருமணம் சாதராண குடும்பத்தில் நடப்பது போன்று மிகவும் எளிமையான முறையில் நடக்கவுள்ளதாக பூட்டான் அரண்மணை வட்டாரம் கூறியுள்ளது. பூட்டான் மன்னராக இருப்பவர் ஜிக்மி கெய்சர்நெம்ஜியால் வாங்சூக்(31).

இவர் கடந்த 2008ம் ஆண்டு பூட்டான் நாட்‌டின் மன்னராக தனது தந்தை ஜிக்மிசெங்கியீ முடிதுறந்ததையடுத்து பொறுப்பேற்றார். இந்நிலையில் பூட்டான் பாராளுமன்ற கூட்டம் திம்புவில் நடந்தது.

இதில் கலந்து கொண்டு பேசுகையில் மன்னர் ஜிக்மி கெய்சர்நெம்ஜியால் பேசியதாவது: என் மனதை கவர்ந்த ஜெட்சன்பெய்மா என்ற மாணவியை நான் திருமணம் செய்யவுள்ளேன். எனக்கு வரப்போகும் மனைவி படித்த பெண்ணாக இருக்க வேண்டும். அந்த வகையில் நான் எதிர்பார்த்த அனைத்து தகுதிகளையும் கொண்ட பெண்ணாக ஜெட்சன்பீமாவிடம் உள்ளார்.

வரும் அக்டோபர் மாதம் எங்கள் திருமணம் மிகவும் எளிய முறையில் நடக்கிறது. இவ்வாறு அவர் கூறிதுடன் தனது வருங்கால ம‌னைவி ஜெட்சன்பீமாவுடன் இணைந்து எடுத்து கொண்ட புகைப்படத்தினையும் காண்பித்தார் மன்னர் ஜிக்மி கெய்சர்நெம்ஜியால்.

இது குறித்து பூட்டான் பிரதமர் ஜிக்மி தைன்லி கூறுகையில்,"மன்னரின் திருமணத்தை நாடோ ஆவலோடு எதிர்பாக்கிறது" என்றார். இந்த திருமணம் மிகவும் எளிமையான முறையில் நடைபெறவிருப்பதாக பத்திரிக்கைகள் செய்தி வெளியிட்டுள்ளன

News:Lankasri

டுபாயில் பணியாற்றிய இலங்கைப் பெண் சுருக்கிட்டு தற்கொலை

டுபாயில் பணியாற்றி வந்த இலங்கைப் பெண் ஒருவர் சுருக்கிட்டு தற்கொலை செய்து கொண்டுள்ளதாகத் தெரிவிக்கப்படுகிறது.

முந்தல் பிரதேசத்தைச் சேர்ந்த பெண் ஒருவரே இவ்வாறு தூக்கில் தொங்கி உயிரை மாய்த்துக் கொண்டுள்ளார்.

டுபாயில் தொடர்ந்தும் பணியாற்ற முடியாது என குறித்த பெண் பல சந்தர்ப்பங்களில் முறைப்பாடு செய்திருந்ததாக உயிரிழந்த பெண்ணின் கணவர் தெரிவித்துள்ளனர்.

எனினும், போதியளவு பணம் இல்லாத காரணத்தினால் பெண்ணை நாட்டுக்கு திருப்பி அழைக்க முடியாமல் போனதாக அவர் குறிப்பிட்டுள்ளார்.

இதேவேளை, குறித்த பெண்ணின்; சடலத்தை இலங்கைக்கு அனுப்பி வைக்க ஐந்து லட்ச ரூபா கோரியதாக பெண்ணின் தாய் தெரிவித்துள்ளார்.

இந்த சம்பவம் குறித்து முறைப்பாடு செய்யப்பட்டு;ளளதாகவும், விசாரணைகள் ஆரம்பிக்கப்பட்டுள்ளதாகவும் வெளிநாட்டு வேலை வாய்ப்புப் பணியகத்தின் தலைவர் கிங்ஸ்லி ரணவக்க தெரிவித்துள்ளார்.

News:Lankasri

பேஸ்புக்கில் உள்ள "Like" சுட்டியால் கவரப்பட்டு அதையே பெயராக வைத்த தம்பதி

பேஸ்புக் சமூக வலைபின்னலில் "Like" என்ற சுட்டியின் ஊடாக மற்றவர்களால் அனுப்பப்படும் படங்கள் உட்பட ஏனைய விடயங்கள் பற்றி நாம் கருத்துக்களை முன்வைக்கலாம். இதனால் பெரிதும் கவரப்பட்ட ஒரு இஸ்ரேலிய ஜோடி தமது குழந்தைக்கு "Like" என்று பெயரும் வைத்துவிட்டனர். குழந்தை பிறந்ததும் அதற்கு வித்தியாசமாகப் பெயர் வைக்க வேண்டும் என்று பலரும் யோசிப்பதுண்டு.

இலங்கை அரசாங்கம் பயங்கரவாதத்தையே கட்டுப்படுத்தியது! போர்க் குற்றங்களில் ஈடுபடவில்லை அஸ்கிரிய மகாநாயக்க தேரர்

இலங்கையில் போர்க் குற்றங்கள் நிகழ்ந்ததாக எவர் குற்றம் சாட்டினாலும், அதில் உண்மையில்லை.

பயங்கரவாத அமைப்பொன்று நாட்டு மக்களைப் படு கொலை செய்யும்போது எந்தவொரு அரசாங்கமும் பார்த்துக் கொண்டிருக்க முடியாது என்றும் அவர் வலியுறுத்துகின்றார்.

சர்வதேச நிதியமைச்சருக்கு சிறைத் தண்டனை

பாலியல் குற்றச்சாட்டில் கைதான சர்வதேச நிதியமைப்பின் தலைவர் டொமினிக் ஸ்ட்ராஸ்கானுக்கு நியூயார்க் நீதிமன்றம் ஜாமின் வழங்க மறுத்து விட்டது.

அதனால் அவர் ரைக்கர்ஸ் தீவில் உள்ள சிறையில் அடைக்கப்பட்டார். வழக்கில் குற்றச்சாட்டுகள் நிரூபிக்கப்படும் பட்சத்தில் அவருக்கு 25 ஆண்டுகள் வரை சிறை தண்டனை கிடைக்கும்.

சிறையில் வைக்கப்பட்டிருந்த பெண் பத்திரிக்கையாளரை விடுவித்தது ஈரான்

ஈரான் சிறையில் இருந்த பெண் பத்திரிக்கையாளர் டோர்த்தி பர்வஸ் பிரிட்டிஷ் கொலம்பியாவில் உள்ள தனது குடும்பத்தினருடன் மீண்டும் சேர்ந்தார்.

பெண் பத்திரிக்கையாளர் பர்வசை வான்கூவர் விமான நிலையத்தில உறவினர்கள் கட்டி பிடித்து தங்கள் அன்பை பகிர்ந்து கொண்டனர். அவரது தந்தை கூறுகையில்,"மிகச்சிறந்த பெண்மணியாக டோர்த்தி பர்வஸ் தோன்றுகிறார்" என நெகிழ்வுடன் கூறினார்

கிழக்கு மாகாண முதலமைச்சர் தொடர்பில் இரண்டு புலனாய்வு அறிக்கைகள் ஜனாதிபதி வசம்?

கிழக்கு மாகாண முதலமைச்சர் சிவநேசத்துரை சந்திரகாந்தன் தொடர்பில் இரண்டு புலனாய்வு அறிக்கைகள் ஜனாதிபதியிடம் கையளிக்கப்பட்டுள்ளதாக தகவல்கள் வெளியாகியுள்ளன.

பொலிஸ் திணைக்களத்தின் திறமைவாய்ந்த அதிகாரிகளைக் கொண்டு உருவாக்கப்பட்ட அரச புலனாய்வுத்துறையும் மற்றும் இராணுவப் புலனாய்வுத்துறையுமே பிரஸ்தாப அறிக்கைகள் இரண்டையும் தயாரித்துக் கையளித்துள்ளன.

சரத் பொன்சேகாவின் மகள் அபர்ணா விமான நிலையத்தில் தடுத்து வைக்கப்பட்டு விசாரணை

அமெரிக்காவில் பட்டப்படிப்பை முடித்துக் கொண்டு நாடு திரும்பிய சரத் பொன்சேகாவின் இரண்டாவது மகள் அபர்ணா விமான நிலையத்தில் தடுத்து வைக்கப்பட்டு விசாரணைக்குட்படுத்தப்பட்டுள்ளார்.

அபர்ணாவின் பட்டமளிப்பு விழா அண்மையில் நடைபெற்றிருந்தது. அதில் கலந்து கொள்வதற்கு சரத் பொன்சேகாவினால் முடியாமற் போன நிலையில் திருமதி அனோமா பொன்சேகா அண்மையில் அமெரிக்கா சென்றிருந்தார்.

கட்டுநாயக்காவில் அமெரிக்க இராணுவத்தினர் ஆயுதங்களுடன் கைது

துப்பாக்கியுடன் இலங்கைக்குள் நுழைய முயன்றபோது-கட்டுநாயக்க விமான நிலையத்தில் கைது செய்யப்பட்ட இரு அமெரிக்கர்களும் அமெரிக்க இராணுவத்தைச் சேர்ந்தவர்கள் என்று தெரியவந்துள்ளது.

நேற்றுமுன்தினம் இரவு 10.40 மணியளவில் கட்டுநாயக்க விமான நிலையத்தை வந்தடைந்த கட்டார் எயர்வேய்ஸ் விமானத்தில் வந்த போதே இரண்டு அமெரிக்கப் படையினரும் கைது செய்யப்பட்டுள்ளனர். இவர்கள் அமெரிக்காவில் இருந்தே விமானத்தில் புறப்பட்டுள்ளனர்.

மஹிந்த மாமா எங்கள் கதையை கேளுங்கள்' - சிறுவர்களின் உருக்கமான கடிதம்

தமது பெற்றோரின் சம்பளத்தினை அதிகரிக்கக்கோரி பெருந்தோட்டப் பகுதி சிறுவர்கள் சுமார் 5000 தபாலட்டைகளை ஜனாதிபதி மஹிந்த ராஜபக்ஸாவுக்கு அனுப்பி வைத்துள்ளனர். தோட்டத்தொழிலாளர்களான தங்களுடைய பெற்றோர்களுக்கு நியாயமான சம்பள உயர்வு கேட்டு சமூக நல நிறுவனத்தின் ஊடாக இந்தத் தபாலட்டைகளை ஜனாதிபதிக்கு அனுப்பி வைத்துள்ளனர்.

எங்கள் வாழ்க்கை மேம்பட எங்கள் பெற்றோர்களின் சம்பளத்தை உயர்த்துங்கள். பெருந்தோட்டத்தில் வாழும் என்னைப் போன்ற சிறுவர்கள் கல்வியைத் தொடரவும் போஷாக்கான உணவை உட்கொள்ளவும் ஆரோக்கியமாக வாழவும் முடியாதுள்ளது. எனவே எங்கள் பெற்றோர்களாகிய தோட்டத் தொழிலாளர்களுக்கு நியாயமான சம்பளத்தை உயர்த்தித்தர ஆவன செய்யுமாறு கேட்டுக் கொள்கிறேன் என்ற கோரிக்கையைத் தாங்கிய 5000 தபால் அட்டைகளை ஜனாதிபதிக்கு அஞ்சல் செய்தார்கள்.

சுமார் 300 சிறுவர்கள் கலந்து கொண்ட இந்த நிகழ்விற்கு எபோட்சிலி தோட்ட சிறுவர் கழகத் தலைவி செல்வி மலர் தலைமை தாங்கினார். வாழ்க்கைச் செலவு அதிகரித்துள்ள நிலையில் எங்கள் படிப்புச் செலவை ஈடு செய்ய முடியாமலுள்ளது. எனவே சிறுவர்களாகிய நாங்களே அனைத்து சிறுவர் கழகங்களையும் ஒருங்கிணைத்து இந்த அஞ்சல் அட்டைப் பிரசாரத்தைத் தொடங்கியுள்ளோம் என்று அவர் தெரிவித்தார்.

News:Yarlmuslim

தாம்பரத்தில் உள்ள வடிவேலு வீடு மீது 30 பேர் கொண்ட குழுவினர் தாக்குதல்!

திமுக வின் அணுகுண்டாக தன்னை உருவகப் படுத்தி தனது இயல் அளவுக்கு மேலால் சூறாவளிப் பிரச்சாரம் செய்து கருணாநிதி கொம்பனிக்கு ஆதரவாகப் பேசிய வடிவேலுவின் இன்றைய நிலை அவரின் சில நகைச்சுவைகளையே நிதர்சனமாக்கியுள்ளது..

விஜயகாந்தை கடுமையாக தாக்கி பேசினார். தேர்தலில் அ.தி.மு.க. கூட்டணி வெற்றி பெற்றதால் சென்னை சாலி கிராமத்தில் உள்ள வடிவேலு வீட்டில் போலீஸ் பாதுகாப்பு போடப்பட்டு உள்ளது. 

இந்த நிலையில் வடிவேலுவின் பண்ணை வீட்டில் திடீர் தாக்குதல் நடந்து உள்ளது. இந்த பண்ணை வீடு தாம்பரம் அருகேயுள்ள படப்பை புஷ்பகிரி பகுதியில் இருக்கிறது. மாமர தோப்புகள் மத்தியில் இவ்வீடு கட்டப்பட்டு உள்ளது. 

பண்ணை வீட்டில் வேலு என்பவர் காவலாளியாக வேலை பார்க்கிறார்.இவர் தனது குடும்பத்தினருடன் தோப்பில் தனி வீட்டில் வசிக்கிறார். நேற்று மாலை இந்த பண்ணை வீட்டுக்கு 30-க்கும் மேற்பட்ட மர்ம நபர்கள் வந்தனர். 

வீட்டை அவர்கள் சூறையாடினார்கள். அங்கிருந்த பொருட்களை கீழே தள்ளி உடைத்தனர். வீட்டில் 6 கண்ணாடி ஜன்னல்களையும் உடைத்து நொறுக்கினார்கள். 

காவலாளி வேலுவுக்கும் மிரட்டல் விடுத்தனர். அவரிடம் வடிவேலுவின் செல்போன் நம்பரை கொடுக்குமாறு கேட்டனர். அவர் தெரியாது என்றார். உடனே மர்ம ஆசாமிகள் வேலுவின் செல்போனை வாங்கி அதில் வடிவேலு நம்பர் இருக்கிறதா என்று தேடி பார்த்தனர். 

அதில் வடிவேலு எண் இல்லாததால் மீண்டும் அதை வேலுவிடம் கொடுத்தனர்.வருகிற சனிக்கிழமைக்குள் இந்த இடத்தை காலி செய்து விடவேண்டும்.

இல்லா விட்டால் ஜே.சி.பி. எந்திரம் கொண்டு வந்து வீட்டை இடிப்போம் என எச்சரிக்கை விடுத்தனர். பின்னர் அங்கிருந்து புறப்பட்டுச்சென்று விட்டார்கள். 

இது குறித்து காவலாளி வேலு பண்ணை மேலாளர் சங்கருக்கு தகவல் தெரிவித்தார். மேலாளர் சங்கர் மணி மங்கலம் போலீசில் புகார் செய்தார். 

போலீசார் வழக்குப் பதிவு செய்து விசாரணை நடத்துகின்றனர். "எவ்வளவு அடிச்சாலும் தாங்குறானே இவன் ரொம்ப நல்லவன்" என்ற வடிவேலுவின் சினிமா வசனம் உட்பட பல வசனங்கள் ஞாபகத்துக்கு வருகிறது..

தேர்தலில் ஜெயித்து விட்டதால் என்னை அடிக்க அலைவது என்ன நியாயம்? 

தேர்தலில் ஜெயித்து விட்டால் மக்களுக்கு என்ன செய்யலாம் என்பது குறித்து யோசிக்க வேண்டும். அதுதான் நல்ல தலைவருக்கு அடையாளம். ஆனால் தேர்தலில் ஜெயித்து விட்டதால் என்னையும், எனது குடும்பத்தினரையும் அடிக்க அலைவது என்ன நியாயம்.

இனிமேலாவது விஜயகாந்த் நல்ல தலைவராக நடக்க முயற்சிக்க வேண்டும் என்று நடிகர் வடிவேலு கூறியுள்ளார். தேர்தல் பிரசாரத்தின்போது திமுகவுக்கு ஆதரவாகப் பிரசாரம் செய்தார் வடிவேலு. அப்போது அவர் தேமுதிக தலைவர் விஜயகாந்த்தை குறிப்பிட்டு கடுமையாக பிரசாரம் செய்தார். அவரை மிகக் கடுமையாகவும் விமர்சித்தார். இதனால் தேமுதிகவினர் வெகுண்டனர்.

இருப்பினும் தேர்தல் சமயத்தில் பிரச்சினையை வளர்க்க விரும்பாமல் அவர்களை அமைதி காக்கச் செய்தார் விஜயகாந்த். ஆனால் தற்போது தேர்தலில் அதிமுக கூட்டணி அமோக வெற்றி பெற்றுள்ளது. தேமுதிகவின் தயவு தேவைப்படாத அளவுக்கு மிகப் பெரிய வெற்றியை அதிமுக பெற்றுள்ளது. இந்த நிலையில் தேமுதிகவினர் வடிவேலுவைப் பழிவாங்கும் வகையில் நடந்து கொள்ள ஆரம்பித்துள்ளதாக தெரிகிறது.

அவரை வீட்டைத தாக்குவதற்காக சென்னையில் உள்ள வடிவேலுவின் வீட்டுக்கு உருட்டுக் கட்டைகளுடன் பல தேமுதிகவினர் வந்ததால் பரபரப்பு ஏற்பட்டது. தற்போது வடிவேலு பாதுகாப்பு கருதி மதுரையில் உள்ள தனது வீட்டில் தங்கியுள்ளார். மதுரையிலும் தேமுதிகவினர் அவரது வீட்டைச் சுற்றிச் சுற்றி வந்து மிரட்டுவதாக வடிவேலு கூறியுள்ளார்.

இதுகுறித்து அவர் பாதுகாப்பு கோரி போலீஸில் புகார் கொடுத்துள்ளார். இதுதொடர்பாக மதுரையில் உள்ள தனது வீட்டில் அவர் செய்தியாளர்களிடம் பேசுகையில், ஆட்சி மாற்றத்தை மக்கள் விரும்பி இருக்கிறார்கள். அது, நடந்து இருக்கிறது. தமிழக மக்களின் தீர்ப்புக்கு தலைவணங்குகிறேன். இந்த நேரத்தில், தி.மு.க. கூட்டணிக்கு வாக்களித்த மக்களுக்கு நன்றி தெரிவித்துக்கொள்கிறேன்.

அதிமுகவை வைத்துத்தான் விஜயகாந்த் ஜெயித்தார் தி.மு.க.வைப்போல் அ.தி.மு.க.வும் ஒரு பெரிய கட்சி. அந்த கட்சியை வைத்துதான் விஜயகாந்தின் கட்சியும் ஜெயித்து இருக்கிறது. விஜயகாந்தை வைத்து அ.தி.மு.க. ஜெயிக்கவில்லை. ஒரு உண்மையான முதல்வருக்கு ஆதரவாக தேர்தல் பிரசாரம் செய்தேன்.

மக்கள் ஆட்சி மாற்றத்தை விரும்பியதால், இப்போது ஜெயலலிதா அம்மா முதல்வர் ஆகியிருக்கிறார். இந்த சூழ்நிலையில், விஜயகாந்த் கட்சியை சேர்ந்தவர்கள் மீண்டும் என் வீட்டின் மீது கல்வீசி தாக்க முயன்று இருக்கிறார்கள். என் வீட்டையே சுற்றி சுற்றி வருகிறார்கள். வெளில வாடா, எத்தனை நாளைக்குடா உனக்குப் போலீஸ் பாதுகாப்பு கொடுக்கும் என்று பேசுகிறார்கள், மிரட்டுகிறார்கள்.

நான் என்ன சொல்கிறேன் என்றார், உனக்கு மக்கள் தீர்ப்பு கொடுத்துட்டாங்க. ஆனால் அது மக்களுக்கு நன்மை செய்ய வேண்டும் என்பதற்காகத்தான். என் வீட்டில் புகுந்து அடிப்பதற்கோ, என்னை வெட்டுவதற்கோ, என் வீட்டாரை தாக்குவதற்கோ அவர்கள் தீர்ப்பு கொடுக்கவில்லை. அது தப்பான விஷயம். தேர்தலில் ஜெயித்தால், அடுத்து மக்களுக்கு என்ன நன்மைகள் செய்வது? என்று யோசிப்பவர்தான் நல்ல தலைவர்.

ஜெயித்து விட்டோம் என்பதற்காக, என்னையும், என் குடும்பத்தினரையும் அடிப்பதற்கு அலைவது, எந்தவிதத்தில் நியாயம்? அவருடைய டி.வி. மூலம் மூன்று பேர், என்னை பகிரங்கமாக மிரட்டுகிறார்கள். விஜயகாந்த் இனிமேலாவது நல்ல தலைவராக நடந்துகொள்ள வேண்டும். என் வீட்டுக்கு ஆள் அனுப்புவதை இதோடு நிறுத்திக்கொள்ள வேண்டும்.

எனது உயிருக்கு ஏதாவது ஆபத்து ஏற்பட்டால் அதற்கு விஜயகாந்த்தான் முழுப் பொறுப்பும். எனது வீட்டுக்குப் பாதுகாப்பு இல்லை. பாதுகாப்புக்கு இருந்தவர்கள் போய் விட்டார்கள். எனது சென்னை வீட்டுக்குள் மர்ம நபர்கள் புகுந்து மிரடடியுள்ளனர். எனவே எனக்கும், எனது வீட்டாருக்கும் போலீஸார் உரியப் பாதுகாப்பு அளிக்க வேண்டும் என்று கேட்டுக் கொள்கிறேன் என்றார் வடிவேலு.